5 сакавіка на сходзе актыву Менскага аргкамітэта партыі "Беларуская хрысціянская дэмакратыя" адбылася сустрэча з беларускім пісьменнікам Васілём Якавенкам, які расказаў пра свае апошнія творы і працу над падрыхтоўкай трылогіі "Пакутны век" да 2-га выдання. Пісьменніка прадставіў сваім сябрам ягоны зямляк, актывіст партыі Мікола Бамбіза, пры гэтым ён зазначыў, што трылогію "Пакутны век" (у першым выданні) прачытаў з вялікім захапленнем і, можна сказаць, не адрываючыся. "Гэта твор, - казаў ён, - пра наш народ, яго драмы і трагедыі, у ім шмат такога пра што мы ніколі не чулі і нават не здагадваліся, што яно, тое магло быць. Шмат яркіх вобразаў гістарычных асоб, усё добра ўспрымаецца, хвалюе і ўражвае. Для тых, хто не чытаў твор "Пакутны век", гэта можна лічыць вялікім прабелам".

Антось Вусовіч, настаўнік, выказаў думку, што партыі БХД варта звярнуць асаблівую ўвагу на такі маштабны і каларытны твор пісьменніка, бо ў ім ідэі беларускай нацыі, хрысціянства, гісторыі і сучаснасці пераплецены так, што яскрава выяўляюць менталітэт, характар і саму душу народа. Для сяброў партыі, і не толькі БХД, гэты твор можа мець вялікае пазнавальнае і выхаваўчае значэнне. 

У сустрэчы прыняў удзел прафесар Аляксей Рагуля, які ўжо меў магчымасць пазнаёміцца з макетам 2-га выдання "Пакутнага веку". "Я лічу,- сказаў ён, - што гэты твор не мае аналагаў і - можа - не толькі ў беларускай літаратуры. Працуючы раней у жанры публіцыстыкі, пісьменнік навучыўся глыбока пранікаць у сутнасць з'яў і характараў, і гэта цяпер выяўляецца асабліва ў шырокім эпічным палатне "Пакутны век". Не магу назваць, дзе, у якой літаратуры і ў якім творы яшчэ гэтак нязмушана і моцна знітаваны ў адно цэлае гістарызм, філасафічнасць, сацыяльныя матывы і ў той жа час лірычная падача карцін, саміх вобразаў герояў. Тут у пісьменніка ўсё рухаецца і ўсё адухоўлена, нават нежывая прырода. У дапрацаванай і дапоўненай новымі раздзеламі і персанажамі трылогіі "Пакутны век" гістарычная і разам сацыяльна-бытавая панарама яшчэ раз здзіўляе і ўражвае, і гэта новы доказ яскравага таленту і яшчэ далёка не вычарпаных магчымасцей аўтара. Пачынальнік нашага пісьменства Скарына лічыў выдадзеныя ім кнігі лекамі для душы. Пісьменнік Якавенка годна працягвае скарынаўскую традыцыю. Сапраўды, яго раман "Надлом" і трылогія "Пакутны век" і зборнік мастацкай публіцыстыкі "Нячывелле" - выдатны сродак ад нігілізму, касмапалітызму, манкурцтва, што апанавалічасткай беларусаў. Усе ягоныя творы надзелены ўласцівасцю настройваць і лагодзіць душу, уздымаць патрыятычныя пачуцці".

Сход актыву Менскага аргкамітэта БХД вырашыў звярнуцца да сваіх сяброў у сталіцы і па раёнах з прапановай: кожнаму набыць трылогію "Пакутны век" і прапагандаваць яе, а для падтрымкі праекты 2-га выдання зрабіць папярэдні дабрачынны ўнёсак - пералічыць на адрас аўтара пэўную суму грошай. На сходзе вырашана таксама арганізаваць у рамках БХД больш шырокую літаратурную сустрэчу з пісьменнікам.

У адпаведнасці са сваёй праграмай партыя БХД ўвогуле мае цвёрды намер развіваць культурна-асветныя мерапрыемствы, прынамсі, зрабіць стабільнымі курсы па вывучэнні беларускай мовы, беларускай гісторыі, шукаць і рыхтаваць свядомых грамадзян сваёй айчыны.

Віталь Рымашэўскі